Siyasi ideologiya nəyə lazımdır?

Çoxları hesab edir ki, ideologiyası olan adam sosial və siyasi mövzuların müzakirəsində qərəzli olur və bu növ müzakirələrdə gərək insan öz ideologiyasına əsaslanmasın. Bir növü belə düşünən insanlar hesab edirlər ki, sən siyasi mövzuları müzakirə etdiyin zaman əvvəlcədən formalaşmış dəyərlər sistemin olmamalıdır. Bəs bu, doğru və ağlabatan yanaşmadırmı? Həmçinin ideologiyalar bizi doqmatikləşdirirmi?

Biz hesab edirik ki, sosial və siyasi mövzuların müzakirəsinə qoşulmaq istəyən hər bir kəsin ideologiyası – siyasi dəyərlər sistemi olmalıdır. Əks təqdirdə bizim siyasi dəyərlərimizin iyerarxiyası nə bizə, nə də qarşı tərəfə aydın olacaq və biz müdafiə etdiyimiz siyasi xəttlərdə məntiqi ardıcıllığı qoruya bilməyəcəyik. Həmçinin, ideologiyamıza tənqidi yanaşdığımız, mütəmadi olaraq öz siyasi dəyərlərimizi sorğuladığımız və hansısa bir və ya bir neçə müəllifi ideoloji məsələlərdə yekun avtoritet kimi qəbul etmədiyimiz halda bir ideologiyaya mənsub olmağımız bizi mütləq şəkildə doqmatikləşdirmir.